జింక- నక్క కథ

వెనుకటికి గంగానదీ తీరాన ఓ జువ్విచెట్టు ఉండేది. దాని తొర్రలో జరద్గవం అనే ముసలి గద్ద ఉండేది. అది గుడ్డిది కూడా కావడంతో ఎక్కడకీ వెళ్లలేక ఆకలితో అలమటిస్తూ ఉండేది. దాని అవస్థ చూసి జాలిపడిన తోటి పక్షులు… ప్రతిరోజూ తమ పిల్లల కోసమే కాకుండా, దీనికి కూడా ఆహారం తీసుకొచ్చి ఇస్తూ ఉండేవి.

ఒక రోజు ఆ పక్షులన్నీ కలిసి, ఈ గుడ్డి గద్దతో, “చూడు జరద్గవమా! నీవు చూస్తే ముసలిదానివి. అందులోనూ గుడ్డిదానివి. కనుక నీవు వేటకు వెళ్లలేవు. మేమంటావా… తిండి కోసం వేటకు వెళ్లక తప్పదు! అందువల్ల మేము గూడికి చేరే వరకు మా పిల్లలకు కాపలా ఉండు. మేము సాయంత్రం తిరిగి వచ్చేటప్పుడు నీకు ఎప్పటిలాగే మంచి ఆహారం తెస్తాము” అన్నాయి.

దానికి ముసలి గద్ద, “ఎంత మాట! మీరు నాకు చాలా సాయం చేస్తున్నారు. అందుకు ప్రతిగా నేను కూడా నాకు వీలైన సాయం చేస్తాను. తప్పకుండా మీ పిల్లలకు కాపలా ఉంటాను. వారిని కంటికి రెప్పలాగా చూసుకుంటాను” అని మాట ఇచ్చింది. దీనితో పక్షులన్నీ ఎంతో సంతోషించాయి.

ప్రతిరోజూ ఆహారం తెచ్చి తమ పిల్లలతో పాటు ఈ ముసలిగద్దకు కూడా పంచి ఇచ్చేవి. ఇలా కొంత కాలం గడిచింది.

ఒక రోజు ఓ గండుపిల్లి ఆహారం వెతుక్కొంటూ, ఈ ముసలి గద్ద ఉంటున్న చెట్టు దగ్గరకు వచ్చింది. ఆ చెట్టుపైన ఉన్న పక్షి పిల్లలను చూసి దాని నోరు ఊరింది. వెంటనే గబగబా చెట్టు ఎక్కంది. దీనితో పక్షి పిల్లలన్నీ భయంతో అరవడం మొదలు పెట్టాయి. ఆ అరుపులు విన్న ముసలి గద్ద, ఎవరో వచ్చారని గ్రహించింది.

వెంటనే, “ఎవరది?” అని గట్టిగా గద్దించి అడిగింది. ఉలిక్కిపడిన పిల్లి, ఆ గద్దను చూసి భయపడి, వెనక్కు తగ్గింది. లేలేత మాంసం తినాలన్న ఆతృతతో అది గద్దను చూసుకోలేదు. ఇప్పుడు ఒక్కసారిగా దానిని చూసి బిత్తరపోయింది.

అయితే చూస్తూ, చూస్తూ ఆ లేలేత పిల్లల మాంసాన్ని వదులుకోవడం ఆ పిల్లికి ఇష్టంలేదు. ఎలాగైనా వాటిని తినాలని నిర్ణయించుకుంది. అలా జరగాలంటే, ఈ ముసలి గద్దను మాయోపాయంతో బుట్టలో వేసుకోవాలని పిల్లి గ్రహించింది. గజగజా వణుకుతూ నెమ్మదిగా గద్ద దగ్గరకు చేరుకుంది.

ఎవరో తన దగ్గరకు వచ్చారని జరద్గవం గ్రహించింది. “ఎవరు నీవు? ఇక్కడకు ఎందుకు వచ్చావు?” అని గట్టిగా గద్దించి అడిగింది. ఒక్కసారిగా ఉలిక్కిపడిన ఆ పిల్లి, నెమ్మదిగా తేరుకుని, “పక్షిరాజా! నేను ఓ పిల్లిని. నా పేరు దీర్ఘకర్ణం” అని చెప్పింది.

“పిల్లివా! అయితే ఇక్కడ నీకేం పని?” అని బెదిరించింది ఆ గద్ద.

అందుకు ఆ పిల్లి…  “అయ్యా! నేను మీతోనే ఓ పని ఉండి వచ్చాను” అంది.

గద్ద ఆశ్చర్యపోతూ, “పిల్లివైన నీకు నాతో పనా? ఏంటది?” అని ప్రశ్నించింది.

గద్ద మెల్లగా తన దారిలోకి వస్తోందని గ్రహించిన ఆ పిల్లి… “పక్షి రాజా! నేను మిగతా పిల్లుల్లా కాదు. మాంసాహారం మానేసి, పూర్తిగా శాఖాహారిగా మారిపోయాను. పూర్వం చేసిన పాపాలను గడిగేసుకోవడానికి, నిత్యం పవిత్ర గంగానదిలో స్నానం చేస్తున్నాను. పూర్తి బ్రహ్మచర్యం పాటిస్తూ, చాంద్రాయణ వ్రతం చేస్తున్నాను” అని చెప్పింది.

అంతా విన్న ఆ ముసలి గద్ద, “ఓహో, అలాగా ఇంతకీ నీకు నాతో పనేంటి?” అని మళ్లీ ప్రశ్నించింది.

ముసలి గద్ద నెమ్మదిగా బుట్టలో పడుతోందని గ్రహించిన ఆ పిల్లి… “ ఓ పక్షిరాజా, మీ గురించి నేను చాలా గొప్పగా విన్నాను. మీరు చాలా గొప్పవారని, నీతిశాస్త్రాలన్నింటినీ పుక్కిటపట్టారని నాకు తారసపడిన అందరినోటా విన్నాను. అందుకే మిమ్మల్ని కలవాలని, మీ నుంచి గొప్ప విషయాలు తెలుసుకోవాలని వచ్చాను. మీ దయ ఉంటే మీ ఆశ్రయంలో ఉండాలని కోరుకుంటున్నాను. మీరు కాదంటే చెప్పండి… మరెప్పుడూ మీకు ఇలా ఇబ్బంది కలిగించను. ఎక్కడి నుంచి వచ్చానో, అక్కడికే వెళ్లిపోతాను” అని అంది.

ఓ పిల్లి తనను చాలా గొప్పవాడవని పొగడడంతో… గద్దకు చాలా ఆనందం వేసింది. చాలా గర్వంగానూ అనిపించింది. దీనితో, “సరే దీర్ఘకర్ణ! నీవేమీ బాధపడకు. అయితే ఈ చెట్టుపై చాలా పక్షి పిల్లలు ఉన్నాయి. వాటి రక్షణ బాధ్యత నాపై ఉంది. కనుక నీవు ఇక్కడ ఉండడానికి వీలుపడదు” అని చెప్పింది.

వెంటనే ఆ పిల్లి, “పక్షిరాజా! నేను మాంసాహారం మానేశానని ముందే మీకు చెప్పాను. జీవహింస ఘోర పాపమని, భూతదయే గొప్ప ధర్మమని మీ లాంటి పెద్దల వలన నేను తెలుసుకున్నాను. అందువల్ల ఈ లేత పక్షి పిల్లలను అసలే ముట్టుకోను. మీతో పాటే నేను కూడా ఆ పక్షి పిల్లలకు కాపలాగా ఉండి, వాటిని రక్షిస్తాను. నన్ను నమ్మండి” అని చెప్పింది.

పాపం ఆ ముసలి గద్ద… పిల్లి మాటలను గుడ్డిగా నమ్మేసింది. వెంటనే “దీర్ఘకర్ణా! నీవు ఇంత మంచివాడవని తెలియక తొందరపడ్డాను. మరేమీ అనుకోకు. ఇకపై నీవు కూడా నాతో ఉండొచ్చు” అని అభయమిచ్చింది.

తన పథకం పారినందుకు ఆ పిల్లి మనస్సులోనే చిందులు వేసింది. చక్కగా మిగతా పక్షులకు తెలియకుండా, గద్ద ఉండే తొర్రలోనే ఉండసాగింది.

ఇలా కొద్ది రోజులు గడిచిన తరువాత… ఆ పిల్లి… గద్దకు తెలియకుండా చెట్టుపైకి ఎక్కి పక్షి పిల్లలను చంపడం, వాటిని గద్ద తొర్రలోకి తెచ్చి తినడం ప్రారంభించింది. తినగా మిగిలిన ఎముకలను కావాలనే ఆ తొర్రలో విడిచిపెట్టేసేది. పాపం ఆ గద్దకు ఈ విషయం ఏమీ తెలియకపోవడం వల్ల, పిల్లిని గుడ్డిగా నమ్ముతూనే ఉండేది.

అయితే తరచుగా తమ పిల్లలు మాయమవుతుండడంపై మిగతా పక్షులు చాలా ఆందోళన చెందాయి. తమ పిల్లలకు ఇంకా రెక్కలు రాలేదు. కనుక ఎగరలేవు. పోనీ గూటిలో నుంచి కింద పడ్డాయా? అంటే అదీ లేదు. దీనితో తమ పిల్లల ఆచూకీ కోసం పక్షులు వెదకసాగాయి.

ఇదంతా దొంగచాటుగా చూసిన పిల్లి, ఇంకా ఇక్కడే ఉంటే ప్రమాదమని గ్రహించి, అక్కడి నుంచి ఉడాయించింది.

పక్షులు వెతగ్గా వెతగ్గా తమ పిల్లల ఎముకలు గుడ్డి గద్ద తొర్రలో కనిపించాయి. దీనితో వాటి ఆగ్రహం కట్టలు తెంచుకుంది.

పోనీలే పాపం అని ముసలి గద్దకు ఆశ్రయం కల్పించి, ఆహారం అందిస్తే… అది తమ పిల్లలనే చంపేసిందని వాపోయాయి. పట్టరాని కోపంతో మూకుమ్మడిగా ముసలి గద్దపై దాడి చేసి చంపేశాయి. పాపం పిల్లి చేసిన మోసానికి ముసలి గద్ద ప్రాణాలు కోల్పోయింది. అందుకే కొత్త వాళ్లను వెంటనే నమ్మకూడదు. నమ్మితే కష్టాలు తప్పవు” అని కథ ముగించింది కాకి.

దీనితో జింక… ఒకింత అనుమానంతో నక్క వంక చూసింది.

                           *మిత్రులారా కథ ఇంకా ఉంది… వేచి ఉండండి*

ఇదీ చూడండి: పులి – బాటసారి కథ

ఇదీ చూడండి: ఏమిటి ఈ ‘మనిషి’ బ్రతుకు?