అభిమన్యు.. ‘ది రియల్ వారియర్’

 దానికి ఆ రథసారథి ” ఓ రాకుమారా.. అస్త్రశస్త్రాల్లో ఆరితేరిన ద్రోణాచార్యుడి వైపు రథాన్ని పోనివ్వమంటున్నావు.. నీకేమైనా అయితే ఎంత బాధ పడతారు అందరూ.. ఒక్కసారి ఆలోచించు” అని ప్రాధేయపడ్డాడు.

“నా ఎదుట నిలిచింది ఆ ద్రోణుడైనా.. ఆఖరికి సురాధిపతి దేవేంద్రుడైనా.. ఈ యుద్ధరంగాన పోరాడాల్సిందే” అన్నాడు అభిమన్యుడు. ఆ మాటలకు ఆశ్చర్యపోయిన సారథి.. రథాన్ని ద్రోణాచార్యుడి వైపు పోనిస్తాడు. # అభిమన్యు.. ‘ది రియల్ వారియర్’ #

ఏం యుద్ధం ఏం యుద్ధం…?

అభిమన్యుడు బాణాలు సంధించి కురుసేనలకు చుక్కలు చూపించాడు. ఒక పెను తుపాను వస్తే మొక్క, మహా వృక్షం అని తేడా లేకుండా.. ఎలా అయితే భూమి నుంచి పెకలించి వేసేస్తుందో… అలా ఒక సైనికుడు, మహా యోధుడు అన్నది చూడకుండా అందిరినీ ఒంటి చేత్తో విసిరి పారేస్తున్నాడు అభిమన్యుడు.

దుర్యోధనుడి కుమారుడు లక్ష్మణ కుమారుడ్ని, కర్ణుడి సైన్యాన్ని ఇలా ఎందరో అతిరథ మహారథుల్ని అంతం చేశాడు. అభిమన్యుడి దెబ్బకు దుశ్శాసనుడు మూర్ఛపోయాడు. కర్ణ, ద్రోణ, దుర్యోధనుల గుండెలు గగుర్పొడిచేలా యుద్ధం చేశాడు. # అభిమన్యు.. ‘ది రియల్ వారియర్’ #

కోపంతో రగిలిపోయిన దుర్యోధనుడు… అభిమన్యుడ్ని సంహరించమని కౌరవసేన మొత్తాన్ని ఆదేశించాడు. అప్పుడు ద్రోణాచార్యుడు… అభిమన్యుడి యుద్ధ నైపుణ్యాన్ని గమనించి.. అతని చేతిలో ఏ ఆయుధం ఉన్నా.. ఎదుటివారికి మరణం తప్పదని గ్రహించి, కర్ణుడిని.. అభిమన్యుడి విల్లు విరిగేలా బాణాలను సంధించమన్నాడు.

కర్ణుడు.. అభిమన్యుడి విల్లు విరిగేలా బాణాలు వేయగా, కృపాచార్యుడు… అభిమన్యుడి సారథిని సంహరించాడు. ద్రోణాచార్యుడు రథ అశ్వాలను చంపేశాడు. ఇవన్నీ ఏకకాలంలో జరిగాయి. అయినా అభిమన్యుడిలో వేగం తగ్గలేదు. గజ,రథ, అశ్వదళాలు అన్నీ కలిసికట్టుగా తనపై దాడి చేస్తుంటే ఒక చేతిలో ఖడ్గం, మరో చేతిలో రథ చక్రాన్ని డాలుగా ఉపయోగించి పోరాడాడు.

ఆ ఖడ్గాన్ని కూడా కౌరవులు దూరం చేశారు. ఇక రథ చక్రాన్నే ఆయుధంగా చేసుకుని గిరగిరా తిప్పుతూ యుద్ధం చేశాడు. అప్పుడు దుశ్శాసనుడి కొడుకు గధతో అభిమన్యుడి చక్రాన్ని విరగ్గొట్టాడు. యుద్ధ భూమి నుంచి ఓ గధ తీసుకుని దుశ్శాసనుడి కొడుకుపై అభిమన్యుడు విరుచుకుపడ్డాడు. # అభిమన్యు.. ‘ది రియల్ వారియర్’#

ఇద్దరి మధ్య పోరు హోరాహోరిగా సాగింది. దుశ్శాసన కుమారుడు.. అభిమన్యుడి తల పగలగొట్టాడు. అభిమన్యుడు కుప్పకూలిపోయాడు. అయినా కసితీరని కౌరవులు.. అభిమన్యుడి శరీరాన్ని కత్తులతో, బల్లాలతో కుళ్లబొడిచారు. ఇలా అధర్మంగా అభిమన్యుడ్ని చంపేశారు.

అధర్మ యుద్ధాన్ని ఆదేశించినందుకు దుర్యోధనుడు, అమలు పరిచినందుకు ద్రోణుడు, పాలుపంచుకున్నందుకు కర్ణుడు అధర్మంగానే అంతమయ్యారు.

అభిమన్యు నుంచి ఏం నేర్చుకోవచ్చు…?

 అభిమన్యుడి నుంచి మనం నేర్చుకోవాల్సినవి చాలా ఉన్నాయి.

మనకి ఎంత తెలుసని కాదు… తెలిసిన దానిని సరైన రీతిలో వాడుకున్నామా? లేదా? అనేది ముఖ్యం.

జీవితంలో ఎన్నో అనుకుంటాం. కానీ అన్నీ అనుకున్నట్టు జరగవు. అప్పుడు ఎదురైన పరిస్థితులకు తగినట్లు మనం మారాలి.

మన ముందు ఎంత పెద్ద కష్టమైనా ఉండొచ్చు. కానీ వెనుకడుగు వెయ్యకుండా పోరాడాలి.

“నిజమైన పోరాటానికి అర్థం.. ఓడిపోయే వరకు పోరాడటం కాదు… ఊపిరిపోయే వరకు పోరాడటం.”

                                                                           రచయిత – యుగ (కే.ఎం.కే)

ఈ మంచి కథ చదివారా?: మా అమ్మమ్మ